«Bi letter jaso nituen oso denbora gutxian, hamar eguneko tartearekin edo. Biak zuzen-zuzen etorri ziren nik Boiseko city amerikano honetan daukadan etxeraino, eta nire iloba Jimmyk ekarri zizkidan eskura. Azkenekoarekin ailegatu zenean ni mimosaren adarrak txukuntzen ari nintzen, umore onean, zergatik umore txarrean nagoenean ez baitut gardena zaintzeko gogorik izaten, eta dolar bat eman nion saritzat. Jimmyk kezkatuta bezala begiratu zidan, sudurra zimurtzeko berak daukan keinu very nice horrekin».

«Sugeak txoriari begiratzen dionean txoria itsutu egiten da, eta ordura arte begien bistan eduki duenmunduaren zati laburra –zuhaitz batzuk, bizpahiru teilatu, bidea, zeruaren urdina– ezkutatu egiten zaio bat-batean. Barraketako magoen paineluekin gertatzen den bezala, une batez hantxe dauka guztia: koloreak, mugimendua, argia. Hurrengoan, berriz, joan egin da dena, ez da hutsune beltz bat baizik sumatzen».